Акушер-гинеколог, Алматы қаласындағы Asmed әйелдер консультациясының меңгерушісі Айым Бейсембекқызы заң бойынша жүктілікті қай жағдайда үзуге болатынын, бұл процедураның қалай өтетінін және неге шешім әрдайым медициналық, әлеуметтік және этикалық факторларды ескере отырып қабылданатынын түсіндірді.

Қазақстан Республикасы Денсаулық сақтау министрінің 2020 жылғы 9 қазандағы бұйрығына сәйкес, жүктілікті жасанды үзу (медикаментозды немесе хирургиялық әдіспен) келесі жағдайларда мүмкін:

Әйелдің өз қалауы бойынша — жүктіліктің 12 аптасына дейін. Сонымен қатар, медикаментозды түсік — яғни дәрі-дәрмек арқылы жасалатын түсік — етеккірдің 63 күнге дейінгі кідіру мерзімінде ғана мүмкін.

Әлеуметтік көрсеткіштер бойынша — мысалы, зорлау жағдайынан кейін, ажырасқан соң немесе жұбайының қайтыс болуына байланысты — жүктіліктің 22 аптасына дейін.

Медициналық көрсеткіштер бойынша — егер ананың өміріне қауіп төнсе немесе ұрықта өмірге сәйкес келмейтін ауыр патологиялар анықталса.

«Егер скрининг кезінде өрескел даму ақаулары немесе өмірге қабілетсіз ұрық анықталса, біз медициналық көрсеткіштер бойынша жүктілікті үзуге ұсынамыз», — деді Айым Бейсембекқызы.

Оның айтуынша, бұл жағдайда әйелді дәрігерлік-консультативтік комиссияның қарауына жібереді. Комиссия құрамына денсаулық сақтау ұйымының басшысы, акушер-гинеколог және аурудың сипатына қарай тиісті маман — көбіне генетик кіреді. Комиссия жағдайды талдап, егер жүктілікті үзуге көрсеткіштер бар болса, оны хаттамаға тіркеп, тиісті жолдама береді.

Асқазанның болмауы, ішек жеткіліксіздігі, генетикалық тесттермен расталған Дауна, Эдвардса, Патау синдромдары сияқты диагноздар өмірге қабілетсіз деп есептеледі.

«Кейде ата-аналар жүктілікті үзуден бас тартып, мысалы, Дауна синдромы бар баланы дүниеге әкелуді шешеді. Бұл — олардың таңдауы, бірақ ол шешім міндетті түрде нотариалды түрде расталуы керек», — деп толықтырды ол.